რა დეტალები უნდა გაითვალისწინოთ საღებავების შერჩევის და შეღების პროცესის დროს

საღებავის ფერის შერჩევა ძალიან მნიშვნელოვანი და ამასთანავე, შრომატევადი საქმეა. კედლის მოსამზადებელი სამუშაოები, სწორი ფერის შერჩევა და სხვა ფერებთან შეხამება, ამ პროცესების სწორად შესასრულებლად, სასურველია იცოდეთ და გაითვალისწინოთ რამოდენიმე საინტერესო დეტალი, რომელიც დროს, ენერგიას და თანხას დაგაზოგინებთ

1. საღებავის ტიპები

საღებავის შერჩევის დროს საჭიროა ვიცოდეთ რა ტიპის საღებავები გვჭირდება და რომელი იქნება ჩვენი სახლისა თუ ოთახის პირობებისთვის საუკეთესო ვარიანტი. ზეთოვანი საღებავი – მასში შედის შემავსებლები და პიგმენტები, ზეთოვანი საღებავი ჩვეულებრივზე უფრო დიდ ხანს შრება.  გამოიყენება კედლებზე, კარ-ფანჯრებზე, ასევე ხშირად შევხვდებით ლითონის ნაკეთობებზეც. უფრო ხშირად იყენებენ ნაკლებად ტენიანი ადგილებისთვის. ემულსიური საღებავი – შეიძლება იყოს როგორც წყლის, ისე ზეთოვან ბაზაზე დამზადებული, დამატებული პიგმენტი კი სასურველ შეფერილობას აძლევს. ემულსიური სარებავი ხასიათდება სწრაფი გაშრობით. მისი ზედაპირის გაწმენდა წყლით საკმაოდ მარტივია. გამოიყენება სახლის ინტერიერის, კედლების, ჭერის შესაღებად. არსებობს ემულსიური საღებავის ტიპი, რომელიც ხეზე სამუშაოდაც გამოიყენება. ალუმინის საღებავი – ამ ტიპის საღებავი შედგება ალუმინის ნაწილაკებისა და ზეთოვანი ლაქის ნაზავისგან. ის მდგრადია კოროზიისა და ამინდის ზემოქმედებისგან. ალუმინის საღებავი თერმულად საკმაოდ მდგრადია და მაღალ ტემპერატურაზეც ინარჩუნებს პირვანდელ სახეს. ვინილის საღებავი – რთული ნივთიერებებისგან შემდგარი საღებავია. გაშრობის შემდეგ ის საკმაოდ მკვრივდება და მისი გაწმენდა მარტივი ხდება. ვინილის საღებავს ხშირად შეხვდებით სამზარეულოში და სააბაზანოებში, ვინაიდან მისი გამოყენება რეკომენდირებულია ნესტიან ოთახებში. სილიკონის საღებავი – ელასტიური ტიპის საღებავია და მას ხშირად მცირე ბზარებისა და დეფექტების დასამალად იყენებენ. ასევე გააჩნია სოკოს წარმოქმნისგან დამცველობითი ფუნქცია.

2. ფერების შერჩევა

თუ ფერი უკვე აირჩიეთ, მაშინ სასურველია შეამოწმოთ, თუ როგორ შეთავსდება ოთახის განათებასთან, კედლის ზედაპირსა თუ ოთახის სხვა ფერებთან. ამისთვის საჭიროა კედლის მცირე ნაწილის შეღებვა, თუ საღებავმა ტესტი წარმატებით ვერ გაიარა და თქვენ აზრი შეიცვალეთ, ამ შემთხვევაში, თქვენ საკმაო დროსა და თანხას დაზოგავთ. ფერთა შეხამება – ინტერიერის შეღებვის ეს კონკრეტული ნაწილი, ბევრისთვის დიდ პრობლემას წარმოადგენს. ფერთა შეხამება მნიშვნელოვანია, როგორც ოთახში შემავალ ფერებთან, ისე მეზობელი ოთახების ტონალობებთან, დერეფნებთან. სხვადასხვა ფერები ოთახში მისაღები იქნება, თუ მათ რაიმე საერთო ექნებათ ან მათში შემავალი რაიმე კომპონენტის ფერი გაიმეორებს მეორე ფერს. ასევე ფერების შეხამების ერთ-ერთი უმნიშვნელოვანესი დეტალი – განათებაა.

3. განათება

განათება ოთახში უდიდეს ეფექტს ქმნის, სხვადასხვა სახის განათებამ შესაძლოა ფერების განსხვავებული აღქმა გამოიწვიოს, მაგალითად: ვარვარა ნათურები შედარებით თბილ ტონალობებს წარმქოქმნიან და კედლის ფერებსაც უფრო თბილად აქცევენ, საპირისპიროდ მოქმედებს დიოდური განათება, ვინაიდან ის უფრო ცივ ფერებს წარმოქმნის, ინტერიერის ფერებიც ბუნებრივია მის მიხედვით იცვლება და ცივ ტონალობებში გადადის. იმისთვის, რომ ზუსტად გაიგოთ ინტერიერში არსებული ტონალობის ნამდვილი სახე, ამისთვის ბუნებრივი განათებაა საჭირო. სწორედ ამიტომ, საღებავის ფერის შერჩევამდე აუცილებლად გაითვალისწინეთ ოთახში არსებული განათება და ამის შემდეგ მიიღეთ შესაბამისი გადაწყვეტილება.

4. მოსამზადებელი სამუშაოები

იქამდე, სანამ კედლის შეღებვას დაიწყებთ, საჭიროა კედელი დამუშავდეს, დამუშავებაში შედის მისი გასწორება და დაგრუნტვა, ვინაიდან აღნიშნული სამუშაოების გარეშე ვერ მიიღებთ სასურველ შედეგს. შეღებვამდე ასევე აუცილებელია:

• ავეჯის მოშორება, თუ ეს შესაძლებელი არაა, მაშინ მასზე საღებავისგან  დამცავი ფირის გადაკვრა და ოთახის ცენტრში განთავსებაა საჭირო.
• ღებვის პროცესში აუცილებელია უსაფრთხოების სათვალეების ტარება, ასევე გაითვალისწინეთ, რომ ღებვისას ტანსაცმლის დაზიანების მაღალი რისკია.
• გაასუფთავეთ შესაღები კედლები მტვრისგან.
• გამოიყენეთ სპეციალური სამღებრო ლენტი იმ ადგილების დასაფარად, რომლის შეღებვაც არ გსურთ.
• მოძებნეთ და ამოავსეთ ღრმულები შემდეგ კი ზუმფარის გამოყენებით გაასწორეთ კედლის დეფორმირებული ზედაპირი.

5. შეღებვა

და დადგა შეღებვის დროც! მოიმარჯვეთ სამღებრო ლილვაკი ან ფუნჯი, დაასველეთ ის საღებავით და წაუსვით კედელს. პროფესიონალი მღებავები გვირჩევენ, რომ კედლის შეღებვისას გამოვიყენოთ “W” პრინციპი – შეღებვის ეს ტექნიკა მოიცავს ლათინური ასო W-ს მსგავს მოძრაობას. მიყევით ამ პრინციპს და გააფერადეთ კედელი მსგავსი ფორმებით, შემდეგ კი შეავსეთ შეუღებავი ადგილები ისე, რომ ფუნჯი ან ლილვაკი არ მოაშოროთ კედელს. რთულად მისადგომ ადგილებში კი შედარებით პატარა ზომის ფუნჯი გამოიყენეთ. შეღებვის შემდეგ, ოთახში აუცილებელია კარგი ვენტილაციის შექმნა. გააღეთ ფანჯრები და განათავსეთ ვენტილატორი, ეს ყოველივე ოთახში ვენტილაციას შექმნის და საღებავიც უფრო მოკლე დროში გაშრება. წყარო: mihouse.ge